فرق بين التعلق والحب ممكن يكون شكله بسيط جدا بس بالحقيقه هو كبير. الفرق بينهم ان الحب يخليك تعيش ويزيدك حياه، بينما التعلق يتنكر على هيئه حب وممكن يجي يدفنك ويسرق منك حياتك ونفسك وشعورك وكل شيء.
انا كنت شايف شخص كل حياتي، ربطت قيمتي فيه واهدافي فيه، ما كنت ادري ان التعلق ممكن يستهلكني لهالدرجه. كنت اظن ان كثر ما تعلقت كثر ما حبيت، وكنت اقول يعني طبيعي هذا هو الحب، الحب يعور. فعشت على هذا الحب وربطت يومي ومشاعري فيه حتى انجازاتي ربطتها فيه.
رحلتي ما بين الموت والحياه كانت بيد شخص زيه زيي، ما يملك ولا اي شيء يخليه يتحكم بمشاعري وفيني، انا اللي اعطيته هذه الصلاحيات. ولما تصير مشاكل كنت كل مره اتنازل واقول يعني مو مشكله هو بس محتاج وقت، وكل مره ينسحب كنت اركض وراه، ما يهم غلطان انا غلطان، اهم شيء الحب اللي كنت اخذه ما يوقف، مهما كان شكله بشع ومؤلم.
ركضت وراه مو لاني ضعيف، لا عشان صدقت ان الحب يساوي الم، وان العلاقه الحقيقيه لازم تكسرنا عشان نثبتها. كل شيء حرفيا ممكن نحط له مبررات، نبرر الصمت على انه تفكير، والغياب على انه ظرف، والخذلان على انه سوء فهم. وكل مره اطيح كنت انا اللي اعتذر، مو لانه يستحق الاعتذار بس لاني ما كنت اتحمل فكرة اني اخسره.
كملت برضاي الين فقدت نفسي، فقدت قيمتي وشغفي وكرامتي، وصرت اعيش كاني باقي بس الحقيقه انا كنت مختفي. الاصعب مو اني تعلقت فيه، الاصعب اني كنت احب جلادي بدال المهرب منه، كنت اطلب من اللي كسرني انه يرممني. كيف للانسان يحب شخص يؤذيه؟ وكيف ممكن يعطي فرصه على حساب نفسه؟ فرصي كانت كثيره لناس ما تستحق ابدا
المهم لما سحبت الكرت وفكرت فيه، اكتشفت ان اكثر شيء خلاني اتالم مو بس انه اذاني، بل اني انا اللي اخترته واخترت اظل موجود رغم الالم. وللامانه ما قدرت اترك بسهوله، الكل كان يقنعني اترك بس انا كنت رافض، كنت احتاج اقنع نفسي، كنت لازم اعرف شنو رسالة هذا الالم، وقيمة هذا الشخص اللي انتهت علاقتك معاه.
ليش احنا نتعلق وليش ممكن نرى ان احد ياذينا باسم الحب؟ كل انسان ممكن اجابته تختلف لكن هذه اجابتي: اشوف ان الانسان لما ينولد يكون عنده خزانات مثلا للمسكن، الاكل والشراب والاهل هم اللي يعبون هذه الخزانات، لكن يكون عنده خزانه ثانيه مثلا للحب، الامان، العاطفه والاهتمام. انا خزاناتي كانت فاضيه، ما اعتقد اني سمعت "احبك" بما في الكفايه وانا صغير.
فلما يكبر الانسان بخزانات فاضيه، مستعد يدفع اي ثمن عشان يمليها من اي شخص، ما يهم الشخص ولا يهم ايش اخسر، اهم شيء اخذ الحب اللي اهلي ما اعطوني اياه بالشكل الصحيح. لكن وصلت لجذر الموضوع وسألت نفسي: هل انا مستعد ادفع شيك بقدر ايام من عمري بس عشان الحب واخسر نفسي؟
ولقيت الاجابه بعد سنه ونص، بالنهايه انا اللي تركت من راسي، هو ما راح ولا رفضني. مو كلنا نترك الناس لانهم ما يحبونا، احيانا نتركهم لاننا اخيرا حبينا نفسنا. انك تترك شخص مو شرط يعني ما يكون بحياتك، ممكن يكون موجود لكن بمكان الصحيح. انا تركت لاني اخيرا قررت ارجع لنفسي.
شلون رجعت؟ الموضوع ابدا ما كان سهل، رجعت لنفسي يوم بديت اسمع لي، صرت اوقف وسط الزحمه واسألني: ايش تبي؟ واحيانا كنت ابي شيء بسيط، حضن، نومه مرتبه، ماشيه على البحر، كتابة شعور ما قدرت اقوله لاحد. رجعت لنفسي يوم بطلت اراقبه وصرت اراقبني. يوم وقفت اسوي سيناريوهات عن كيف ممكن يرجع، وبدات اسوي سيناريوهات عن كيف ممكن ارجع اعيش حتى لو ما رجع.
رجعت لنفسي لما عرفت ان انا استاهل اكثر من ان اكون مجرد خيار مؤجل لاحد. بدات اعبي خزاناتي الفاضيه بنفسي، كل مره عاملت نفسي بلطف، كل مره ما اجبرت نفسي على احد، كل مره وقفت الوم نفسي عشان احد ما حبني بالشكل اللي انا احتاجه. رجعت لنفسي يوم فهمت ان الحياه ما تعطيني قيمه، انا اللي اعطيها قيمه بوجودي بشعوري واهتمامي الصادق بنفسي.
لما بديت اختارني كل شيء تغير، فعلا. واذا تسألني شنو اول خطوه للتخلص من التعلق؟ اقول لك اسأل نفسك: لو هو اختفى ايش راح يتبقى مني؟
قبل ما انهي يمكن تتساءل ليه كل هالكلام؟ وليه ارجع لكل هالالم؟ لان اليوم قاعد العب "ما بينّا غريب" معه، ايه الشخص اللي كنت اتكلم عنه قدامي قاعد يسمع، قاعد يسحب كروت، يمكن توجع، ويمكن ما يدري ان كل كلمه قلتها كانت عنه. المهم انه لما جا دوري وطلع لي الكرت، قررت اجاوب وقررت اتكلم حتى لو ما سمعني، لان اليوم انا مو قاعد اتكلم عشان هو يفهمني، انا اتكلم عشان انا افهم اللي صار.
بس تدري اللي صار بعد كل شيء؟ ما كنت اتوقعه. لما بديت احب نفسي صار ما يهم اذا رجع لي او لا، صار حبي له مو تعلق، صار حب ناضج واعي. انا اليوم اقدر اقول اني محظوظ مو لاني رجعت له، لا، انا فكيت التعلق وعرفت كيف احب صح، صرت احبه بس بدون الم وبدون لهفة تذلني وبدون خوف يخنقني. صرت اشوف انسان زيه زيي، عادي يعني.
والاجمل ان هو بعد تغير، صرت اسمع نظرة احترام بصوته، ونظرة فخر بعينه، كانه اول مره يشوفني انا.
[17/07/2026 16:10] Mark~: صار يشوفني لاني انا صرت اشوف نفسي. حتى وانا العب معه الحين حسيت اننا اول مره نتعرف على بعض، مو لانها لعبه جديده علينا، بس لان احنا صرنا ناس جديده، صرنا نسخ جديده من بعض وعرفنا نحب بعض صح.
• هذا السؤال ما كان صدفه، بعض الاسئله تفكك بس عشان ترجع ترتب نفسك صح، حتى لو كانت مجرد لعبه.
المصدر : ما بيننا غريب❤️.