خلنا نتكلم جد. أنت اليوم طلعت من علاقة، يمكن كانت حب، يمكن كانت صداقة، يمكن كانت علاقة عابرة وانتهت وأنت الحين تبي تتخطى. ما في زر للتخطي، ما في أحد يقدر يعطيك وصفة سحرية تسويها عشان تنسى كل شيء. التخطي ما يصير بثلاث جمل تحفظها ولا بكتاب تقرأه، بس يصير بخطوات بسيطة لو سويتها بصدق راح تمشي قدام حتى لو كنت بطيء. لك عشر خطوات ما راح أقول لك فيها إنك لازم تكون قوي، بس راح أقول لك كل خطوة تقدر تغير فيك شيء لو طبقتها بوعي وكررتها لما ترجع تتعب.
١. ابك
عيش الألم، الألم ما يذبح الكتمان هو اللي يسود الدنيا. لا تتهرب من وجعك، خذ حقك في البكا وخلك صادق مع قلبك. لا تحاول تتجاوزه قبل ما يمر فيك، مو وقت التماسك ولا وقت المثالية. ابك حتى لو أرسلت رسالة وما رد عليها، مو شرط تكون بطل من أول يوم. ابداً ابداً لا تقاوم، لا تقاوم أي شعور يجيك. إذا جاك حزن لا تقاومه، إذا حسيت بشوق لا تسكته، إذا ضاق صدرك لا تضحك عشان تتهرب. كل شعور تحاول تهرب منه بيرجع لك أضعاف، يمكن ما يرجع اليوم بس بيرجع وأنت أضعف منه. المشاعر موجات لو خفت منها تغرقك، بس لو سمحت لها تمر بتهدأ. لا تتهرب من اللي تحس فيه، اقعد مع شعورك اسأله: وش جاي تقول لي؟ وبعدها خله يروح، بس بعد ما تسمع، مو قبلها.
٢. السرير للنوم فقط
السرير مو مساحة تأجيل، هو مكان راحة. لا تخلي مكان راحتك يصير مكان عزلتك. لا تصير تنام عشان تهرب، النوم مو زر مسح. السرير ما انخلق يكون منفى ولا مكان تذبل فيه. لو قضيت يومك كله فيه ما راح ترتاح، راح تصير تنام وتكون بنفس التعب لأنك ما أعطيته وظيفة صحية وهي الراحة. السرير مو مكان تطيح فيه وتحاول تنساه، هو مكان ترجع له بعد ما تواجه، بعد ما تتنفس، بعد ما تقول لنفسك "أنا اليوم تعبت وراح أرتاح" مو "أهرب". المكان اللي تبكي فيه كثير يصير يشيل وجعك ويكررك كل يوم. غير مكان وجعك، قم حتى لو ما عندك شيء تسويه.
PDF
٣. لا تراقب
لا تراقب، حتى لو فضولك يذبحك. كل مرة تفتح حسابه ترى ما تراقبه هو، تراقب النسخة اللي كنت تتمنى يطلعها بس هو راح وأنت تحتاج تروح بعد. امنع التواصل، المراقبة سجن بطيء والمواجهة وهم: اللي تبي تسمعه منه ما راح تسمعه. المراقبة ما تريح، ترجعك لنقطة الصفر وأحياناً تفتح باب وهم وتسكر باب التعافي. أنت ما تحتاج رد ولا اعتراف، اللي تحتاجه هو راحة. فلو تبي تبدأ تتخطى صح، احذف الوصول قبل لا تحاول تحذف الذكرى.
٤. لا تطلب اعتذاراً
أنت ما تحتاج أي اعتذار، أنت تحتاج توقف تعطيه هذا الدور بحياتك. كل ما قلت لو بس يجي يقول آسف كأنك تنتظر إذن عشان تتعافى. ترى ما يحتاج، اللي ما فهمك وأنت معه ما راح يشرح لك بعد ما راح. خليك واضح مع نفسك، تعافيك مسؤوليتك مو مكافأة من أحد. والسكوت ترى جواب حتى لو ما يعجبك. لا تطلب الاعتذار حتى لو كنت تستحقه.
٥. اكتب مشاعرك
حتى لو ما تدري وش تقول، الورقة ما تسأل وما تحكم وما تتعب، بس تشيل. فكر بالأشياء اللي كانت تكسر داخلك وأنت ساكت. سو قائمة مع صديق أو مع نفسك مو علشان تكره، علشان ما تنسى ليه قاومت ترجع. هذا مو حقد، هذا توثيق لكرامتك. بعدها حول على نفسك، ارجع اسأل نفسك أسئلة جديدة: إيش أنا أحب؟ إيش الشيء اللي يخليني أضحك؟ إيش كان شغفي قبل ما يدخل هالإنسان حياتي؟ اكتب يومياً بدون تفكير.
٦. لا تهرب لشخص جديد
لا تتعرف على أحد جديد بسرعة، هذا هروب. أول ما تنفصل أول شيء تفكر فيه تفتح سناب، تندر، انستغرام. المشكلة أنك تستخدم إنسان جديد كعلاج مؤقت لإنسان قديم. لا تدخل علاقة جديدة عشان تثبت لنفسك أنك مرغوب وأنت ما زلت مكسور. لا تهرب لشخص جديد، اللي يجي بسرعة يروح بسرعة. بعضهم يكمل تكسيرك ويخليك تشتاق حتى للخيانة القديمة، مشاعرك مو لعبة.
٧. اشتغل وكن مشغولاً
خلك مشغول بس لا تكون هارب. أنت الحين مدمن على وجوده، بدل ما تظل مدمن على مراقبة أو تفكير، صير مدمن على كتابة أو إنجاز. حتى ترتيب الرف اللي ما لمسته من شهور، طاقة ما تموت بس تقدر تغير اتجاهها. قدامك خيار يا تستنزف نفسك في دوامة، يا تبني لك شيء حتى لو بسيط.
٨. تحرك
الحزن ثقيل بس مو بس على قلبك، الحزن يتخزن في جسمك في كتفك في صدرك، في رأسك، وتصحى الصبح تعبان حتى لو نمت عشر ساعات. الجسم يتأثر بالحزن، مو لازم تصير رياضي بس لازم تتحرك، تخلي جسمك يتذكر أنك حي وأنك تقدر تتحرك حتى وأنت مكسور. المشاعر اللي ما تطلع بصوتك تطلع كلام بجسمك. فلا تسكت، حتى لو سكت الكلام خلي جسمك يتكلم عنك شوي.
٩. نظف محيطك
المكان يؤثر أكثر مما تعتقد؛ الريحة، الإضاءة، المخدة اللي تشبهه، كل شيء تقدر تغيره غيره. أحياناً التغيير يبدأ بكيس زبالة، في أشياء صغيرة جداً بس تشيل طاقة ضخمة جداً. ريحة، لون، مكان، حتى رسالة قديمة بالجوال، كلهم يسحبونك كل يوم نقطة ورا. ارم كل شيء قديم، نظف غرفتك، امسح المحادثة، ارم كل شيء ما عاد له وظيفة إلا أنه يذكرك في وجعك. لا تعيش في متحف علاقة انتهت.
١٠. تقبل الواقع
كلمة "لو" ما راح ترجع شيء، وكلمة "يمكن" ما راح تبني جديد. التخطي يبدأ يوم تقول "أنا أستحق أرجع لي مو له". سامح نفسك، سامح نفسك على كل لحظة صدقت فيها أنه بيتغير، على كل مرة ضحيت وسكتت وخليت كرامتك تنكسر بس عشان ما تخسرها. سامح نفسك حتى على اللي سويته وأنت مكسور، أحياناً نظلم نفسنا عشان نرضي أحد بس لا تنسى كنت تحب وكنت تحاول وهذا لحاله يستحق غفران. قول هالجملة كل يوم حتى لو بصوت مكسور: "أنا أستحق حب نظيف حتى لو ما تعودت عليه".
الخاتمة:
التخطي مو نسيان، هو لما تبدأ تختار نفسك على أي أحد ثاني. التخطي ما هو خط مستقيم، في أيام بترجع تبكي، في ليالي بتفكر ترجع، بس الفرق أنك صرت تعرف وش تسوي. يمكن ما تطبق كل الخطوات بيوم، بس كل خطوة تسويها هي إعلان حب منك لنفسك. إذا وصلت لهنا ووقفت وضعت وضيعت طريقك ما في مشكلة، ارجع لأول خطوة وابدأ من جديد لأن التخطي مو مرة واحدة وتخلص، هو كل مرة تختار ترجع لنفسك بدل ما ترجع له.